Олимпийн эрх авсан тамирчдад 10 сая төгрөг олгоно

2 жил, 10 сар өмнө

Биеийн тамир, спортын салбарын үйл ажиллагаа, олимп, паралимпын наадамд Монгол Улсыг төлөөлөн оролцох Үндэсний шигшээ багийн бэлтгэл ажлын явцтай танилцаж, дэмжлэг үзүүлэх зорилгоор олимпийн наадамд бэлтгэх Үндэсний хорооны ээлжит хуралдаан боллоо.

Хуралдаанд Монгол Улсын Ерөнхий сайд, Үндэсний хорооны дарга Л.Оюун-Эрдэнэ, Үндэсний хорооны гишүүн Засгийн газрын гишүүд, агентлагийн дарга, Биеийн тамир, спортын Улсын хорооны дарга Ц.Шаравжамц, Төрийн өмчит үйлдвэрийн газрын захирлууд болон олимпийн наадамд бэлтгэх дэд ажлын хэсгийн гишүүд зэрэг албаны бусад хүмүүс оролцлоо.

Хуралдаанаар Биеийн тамир, спортын салбарт хэрэгжиж байгаа үйл ажиллагаа, “Токио-2020” олимп, паралимпийн наадамд оролцох Монгол Улсын Үндэсний шигшээ багийн бэлтгэл ажил, “Токио Олимп сан”-гаас хэрэгжүүлсэн үйл ажиллагааны мэдээллийг сонсож, хэлэлцсэн асуудлуудтай холбоотой тогтоолын төслийг баталлаа.

Монгол Улсын Ерөнхий сайд Л.Оюун-Эрдэнэ энэ үеэр Токио-2020 олимп, паралимпийн наадамд оролцох баг тамирчдаа бүх боломжоороо дэмжихээ илэрхийлээд тамирчдын амжилтад цалин урамшуулал чухал ач холбогдолтой. Тиймээс үндэсний шигшээ багийн тамирчдын цалинг олимп хүртэл 1.5 сая төгрөг болгон нэмэгдүүлж, олимп, паралимпийн эрх авсан тамирчдад нэг удаа 10 сая төгрөгийн урамшуулал олгох асуудлыг Засгийн газрын хуралдаанаар хэлэлцүүлж, шийдвэрлэхээр болсноо мэдэгдлээ.

Мөн хуралдаанаар Covid-19 цар тахлын нөхцөл байдлын үед бэлтгэл сургуулилтад хамрагдаж байгаа Үндэсний шигшээ багийн болон Монгол Улсыг олимп, паралимпийн наадамд төлөөлөн оролцох багийн нийт бүрэлдэхүүнийг PCR шинжилгээ, вакцинжуулалтад хамруулан паспортжуулах, эрхийн оноо цуглуулах;

Эрх олгох олон улсын тэмцээн, Монгол Улсыг олимп, паралимпийн наадамд төлөөлөн оролцох багийн бүрэлдэхүүнийг улс хооронд зорчих тусгай үүргийн болон олон улсын нислэгийн хуваарьт оруулах зохион байгуулалтын арга хэмжээ авч, дэмжлэг үзүүлэх;

“Токио-2020” олимп, паралимпийн наадамд бэлтгэж байгаа Үндэсний шигшээ багийн бүрэлдэхүүнийг Covid-19-аас урьдчилан сэргийлэх, эрсдэлийг бууруулах зорилгоор холбогдох хууль тогтоомжийн хүрээнд ариутгал халдваргүйжүүлэлт, халдвар, хамгааллын горим, дэглэмийг чанд баримтлан тусгаарлах бүс тогтоон байрлуулан, бэлтгэл сургуулилт хийхэд дэмжлэг үзүүлж ажиллах болон бусад асуудлыг хэлэлцэж, тогтоолын төслийг үндэсний хорооны нийт гишүүдийн 100% саналаар дэмжин баталлаа.